Елімізде трансплантология саласы күн санап дамып келе жатыр. Әлемдік стандарттарға сәйкес медициналық көмек көрсету – мемлекеттік тараптан халыққа ең үлкен көмек. Бірақ бұл салада жақсылығымен қатар қиындықтары бар екені мәлім. Осы саладағы жаңалықтар туралы студия қонағы профессор Жақсылық Досқалиев сөз қозғады. Жақсылық Досқалиев: Әр елдің медицина саласындағы көмегі трансплантация жасауымен өлшенеді. Осыған орай біздің дамыған елдің қатарына кіреміз деген үлкен бағдарламаларымыз бар. Қазақстанда 2012 жылдан бастап трансплантация саласы өте жақсы дамып келе жатыр. Атап кетсек, елімізде 7 орталықта трансплантация жасалады. Қуантарлық жағдай, соңғы 2-3 жылдың ішінде кішкентай балалардың ағзасын ауыстыруға қазақстандық дәрігерлердің қолы жетті. Бүгінгі таңда 1600-ден астам адамға ағзасын ауыстыру отасы жасалды. 2700 адам бауыр ауыстыруға мұқтаж. Ең күрделі ота – жүрек, өкпе, бауыр ауыстыру. Қазақстанның заңнамасына сәйкес тірі адам донор бола алады. Ол туысы болу міндетті емес. Генетикалық байланыс пен адамның ағзасының құрамы бір-біріне сәйкес болуы керек. Тағы бір қуантарлық жайт – қазақстандық медициналық туризм. Шетелден келіп, елімізде ота жасата алады. Біздің медицина саласы дамыған елдерден төмен емес.
Ұйым туралы негізгі ақпарат
ҚР ДСМ «Транспланттауды және жоғары технологиялық медициналық қызметті үйлестіру жөніндегі республикалық орталық» Шаруашылық жүргізу құқығындағы республикалық мемлекеттік кәсіпорны (бұдан әрі – «ТЖТМҚҮРО» ШЖҚ РМК) Қазақстан Республикасының аумағында транспланттау қызметін дамытуға жәрдемдесу бойынша функцияларды жүзеге асыру үшін құрылған. Мекеменің негізгі мақсаты Қазақстан Республикасының аумағында транспланттау қызметін үйлестіру болып табылады.
ТЖТМҚҮРО қызметінің мақсаты Қазақстан Республикасында ағзалық донорлықтың тиімді ұлттық жүйесін құру және трансплантология ғылымын дамыту болып табылады.
Транспланттау қызметін үйлестіру ТЖТМҚҮРО тәулік бойы режимінде жүзеге асырылады. Транспланттау қызметін үйлестіруді қамтамасыз ету үшін, облыс орталықтарында, республикалық маңызы бар Астана және Алматы қалаларында өкілдіктер құрылған. Елде бүгінгі күні ағзаларды алу жүзеге асырылатын 40 донорлық стационар, транспланттау бойынша ота жүргізуге лицензиясы бар 7 транспланттау орталығы қызмет етеді.
